27 Xul Os colexios da saúde únense na Homenaxe as Vítimas do covid-19
Este martes, 28 de xullo, terá lugar unha homenaxe dos profesionais sanitarios de toda Galicia ás vítimas do covid-19. Serán os trinta e un colexios profesionais sanitarios de Galicia os que darán a súa mensaxe sobre a situación vivida. É a primeira vez que todas estas institucións galegas de saúde únense para organizar un acto en común. Eduardo Ferreiro, xornalista da TVG, encargarase de conducir a homenaxe, que será breve, solemne e austera.
O evento desenvólvese no Salón Nobre do Pazo de Fonseca da Universidade de Santiago de Compostela, ás 11 horas. O acto contempla que un representante de cada colexio lerá parte dun manifesto no que se lembrará ás vítimas e a repercusión da pandemia para os profesionais e a sociedade.
Ao finalizar a lectura, a soprano Laura Alonso e o pianista Javier Ares interpretarán dúas pezas musicais coas que se pechará o acto. A iniciativa partiu do Consello Galego de Colexios Médicos e contou co respaldo absoluto das profesións sanitarias de Galicia que participaron nunha reunión preparatoria celebrada o pasado 30 de xuño. Á iniciativa sumáronse logo dous colexios máis: os de biólogos e químicos.
