As respostas están na ciencia, acto en defensa do coñecemento científico fronte á desinformación

As respostas están na ciencia, acto en defensa do coñecemento científico fronte á desinformación

O pasado sábado celebrouse, no salón nobre do Pazo de Fonseca da Universidade de Santiago de Compostela, o acto As respostas están na ciencia, no que as academias e colexios profesionais sanitarios de Galicia, xunto aos decanos e directores das facultades de ciencias sanitarias da comunidade uníronse para dar testemuño da importancia de guiarse sempre pola mellor evidencia científica dispoñible en cada momento.

Durante o acto, en representación de todas as institucións participantes, o profesor Ángel Carracedo, director da Fundación Pública Galega de Medicina Xenómica e catedrático de Medicina Legal da USC, leu un manifesto para mostrar o compromiso de todas elas co coñecemento científico e “coa cidadanía galega na procura da calidade, a equidade e a excelencia nos servizos relacionados coa saúde”.

O presidente do Colexio Oficial de Médicos da provincia da Coruña, Luciano Vidán, presentou a sesión e asegurou que “cando hai un problema, como foi o da pandemia nestes últimos anos, a mellor resposta atópase sempre na ciencia. Non só agora, senón ao longo da historia demostrouse que é positivo botar a vista á xente que está a investigar”. O presidente da institución colexial tamén agradeceu a presenza das entidades que se sumaron ao acto e a Ángel Carracedo “por ser a voz que transmita a nosa mensaxe á cidadanía”.

Na súa intervención, o profesor Carracedo expresou a súa preocupación polo feito de que, “nos últimos anos, non parasen de xurdir mensaxes e receitas que se ofrecen aos medios de comunicación como solucións fáciles e máxicas a problemas complexos de saúde. Desgraciadamente, estas ideas calan —aínda que só sexa de forma minoritaria— nalgúns segmentos de poboación”. Trala chegada da covid-19, “esa tendencia gañou aínda máis forza, con teorías, discursos e propostas negacionistas que non teñen ningunha base racional nin científica. Tememos, e queremos evitar, que a proliferación deste tipo de mensaxes sexan unha fonte de desinformación, desorientación e expectativas erróneas para os pacientes”.

Con ese obxectivo en mente, asegurou que “as academias, os colexios profesionais sanitarios e a universidade ofrecémonos, en Galicia, como fonte de información e formación activa, fiable, sempre dispoñible para a sociedade e baseada na maior evidencia científica e o coñecemento máis consolidado posible. Así o fixemos e estamos a facer durante a pandemia”.

Doutra banda, encomiou a “adecuada” resposta “da maior parte da cidadanía e dos responsables públicos ante a crise sanitaria. Vímolo no alto porcentaxe de vacinación que conseguimos, e tamén no razoable nivel de seguimento das medidas de protección individual e social”. Para alcanzar eses logros “foi fundamental o traballo diario e o extenuante esforzo que realizaron os profesionais sanitarios, que tiveron que facer fronte, en certos momentos, a un gran risco persoal”.

Ademais, fixo fincapé “no importante esforzo” realizado no ámbito da investigación por parte de todas as ramas da ciencia, “tanto en Galicia como a nivel español e internacional”. Grazas a “un labor titánico, están a conseguir resultados fundamentais para o control da pandemia. A colaboración internacional, sen precedentes históricos, e o entusiasmo das investigadoras e investigadores están a facelo posible”.

A necesidade de tomar decisións rápidas ante un virus descoñecido “conlevaron un reto difícil para a comunidade científica internacional. E a resposta foi, en termos xerais, excelente”, sinalou. “O método científico é o que dá validez ao noso coñecemento. Os bulos sanitarios e as falsas solucións terannos sempre enfronte. Os profesionais sanitarios e a universidade responderemos sempre coa nosa opinión e información honesta, tranquila e sólida, baseada no rigor científico e o mellor coñecemento dispoñible”.

Para rematar, lembrouse e homenaxeou “a todos os compañeiros sanitarios e cidadáns que sufriron as consecuencias desta terrible pandemia. No seu nome e no seu recordo seguiremos traballando, desde a ciencia, ao servizo da cidadanía”.

As respostas están na ciencia foi un evento histórico: por primeira vez, os colexios profesionais, as academias e as facultades relacionadas coas ciencias da saúde uníronse por unha causa común. En total, foron convocadas a participar máis de 60 institucións: a Real Academia Galega de Ciencias, as academias de Ciencias Veterinarias e Enfermería de Galicia, as reais academias de Farmacia e Medicamento de Galicia e as academias médico-cirúrxicas de Santiago e Ourense; os colexios de Biólogos, Dentistas, Dietistas- Nutricionistas, Enfermería, Farmacéuticos, Fisioterapeutas, Higienistas Dentais, Logopedas, Médicos, Odontólogos e Estomátologos, Ópticos-Optometristas, Podólogos, Protésicos Dentais, Psicoloxía, Químicos, Terapeutas Ocupacionais, Traballo Social e Veterinarios de Galicia e as catro provincias galegas; a Organización Médica Colexial; as facultades de Ciencias, Ciencias da Saúde, Enfermería e Podoloxía e Fisioterapia da UDC; de Bioloxía, Ciencias, Enfermería, Farmacia, Medicamento e Odontoloxía, Óptica e Optometría, Psicoloxía, Veterinaria e Química da USC, e de Bioloxía, Fisioterapia e Química da Universidade de Vigo, alén das escolas universitarias de Enfermería da Coruña (UDC), Lugo (USC) e Deputación Provincial de Pontevedra, Meixoeiro, Ourense e Povisa (Universidade de Vigo).

Se che gustou, compárteo! Share on Facebook
Facebook
Share on LinkedIn
Linkedin
Tweet about this on Twitter
Twitter
Email this to someone
email
Print this page
Print


error: contido protexido!
Falamos?